تجرتي الكاملة مع اختبار ايلتس

قبل ما أبلش بالموضوع ,, فكرت بين اني اكتب باللغة العربية الفصحة أو اني اكتب بأسلوب لهجتنا العامية ,, و أنا صراحة كتابتي بالعربية الفصحة مو قويه 100% و اغلبنا يفضل لهجتنا العامية لسهولة الفهم وأيضا البعض يفضل القراءة بأسلوب لغوي عربي ,, فقررت ان يكون اسلوبي بالكلام مختلط ما بين العربية الفصحة ولهجتنا العامية مثل ما أنا قعد اكتب ألحين واعتقد ان إذا خلطت بينهم راح يكون أسهل من اني اركز على واحد فيهم وان شاء الله كل شي راح اكتبه يكون مفهوم عليكم واذا في أي شي مو فاهمينه أنا حاضر راح افهمكم ياه .

IELTS : International English Language Testing System

اختبار الآيلز : نظام اختبار اللغة الإنجليزية الدولي

لا يخرعكم الإسم 

حسب نظري وتجربتي له اهو اختبار يقيس جميع مهارات اللغة الإنجليزية عندكم سواء المهارات البسيطه والسهلة أو الصعبة واللي تحتاج جهد لجعلها سهلة وبسيطة .

البعض منكم حاط فباله إن هالإختبار فيه سقوط ونجاح ,, طبعا هالكلام خاطئ ومافيه شي اسمه سقوط ونجاح بهالإختبار ,, هالإختبار يبينلكم شنو مستواكم بالإنجليزي .

الإختبار من 9 ,, طبعا مو 9 يعني 9 أسئلة بس  ,, اتصور أنا من 900 بس بعد ما يجمعون النتايج ويطرحون و يقسمون و عمليات حسابية طويلة بالنهاية تطلعلهم النتيجة من 9 ,, مثلا اذا واحد فيكم ياب 3 من 9 معناتها مستواه بالإنجليزي نازل ومثلا وحده فيكم يابت 7 من 9 يعني مستواها بالإنجليزي عالي ,, و جذي طريقة النتايج مافي درجه معينه حق السقوط أو درجة معينه للنجاح ,, الدرجة فقط اتبينلكم انتوا شنو مستواكم بالإنجليزي .

طبعا هالإمتحان سالفتي معاه طويلة وأنا باختصرها ,, تقريبا شهر 8 قبل ما تبلش السنة الدراسية وبعد ما قدمت أوراقي بـ GUST وأيضا بعد سقوطي بإختبار تحديد المستوى و عرفت اني من طلبة التمهيدي esl 1  ,, قالولي عن اختبار اسمه الآيلز أسهل من اختبار التوفل ومطلوب بجامعتنا واذا يبت درجة معينه فيه تقدر اتطوف التمهيدي ,, وطبعا انا وايد سئلت عن مرحلة التمهيدي ومادري شلون ما ارتحت من اللي سمعته فقلت اروح اسجل حق هالإختبار واشد حيلي فيه واطوف التمهيدي وادخل بالمواد وحطيتلي موعد للإختبار شهر 10 و تالي صارتلي ظروف بهالشهر فانجبرت اني اغير الموعد إلى شهر 12 وقلت بيني وبين نفسي مو مشكله أداوم كورس واحد تمهيدي منها استفيد بعد وبالتالي نختبر هالإختبار وانطوف التمهيدي الثاني ,, والحمد لله وصلت للهدف اللي حطيته فبالي ويبت الدرجة اللي اتطوفني التمهيدي الأول و الثاني واللي اتدخلني عالأكاديميك الإنجليزي ... وهاذي سالفتي بإختصار.

وهم في شغلة صغيره حبيت اقولكم ياها ,, لحد يقول إذا طفت التمهيدي وما اخذته راح تكون انجليزيتي مو قويه وما راح افلح بالمواد إلا بعد ما آخذ التمهيدي ,,, يا جماعة اللغة الإنجليزية ماهي لغة يديده أول مره ناخذها وعمرنا ما درسناها ,, اللغة الإنجليزية فقط تحتاج للمارسة وراح تتقوون بهاللغة من خلال الممارسة ,, لو كل يوم تقرون لكم قصة بالإنجليزي أو اتطالعون فيلم او تقرون جريده راح تتقوون ,, انا بس حبيت اوضح لكم ان الانجليزي ما تتعلمونه احنا متعلمينه بالمدارس وخالصين , انما الإنجليزي ممارسة ومن خلال الممارسة راح تصيرون فلته فيه ان شاء الله .

اعذروني دخلت بمواضيع مالها داعي وخلطت مواضيع فبعضها ,, بس حبيت أوضح لكم اشياء يمكن يكون البعض غافل عنهاز

نرجع لإختبار الآيلز :

طبعا هالإختبار في منه نوعين ,, النوع الأول : Academic و النوع الثاني General ,, و اعتقد سمعتوا عن قرار الجامعة بخصوص إلغاء نوع general وقبول فقط الـ Academic ,, شنو الفرق بينهم ؟؟ ,, الله يسلمكم الفرق بينهم إن الجينيرال حق الناس اللي بيهاجرون واللي بيسافرون بره واعتقد في بعض الدول تحتاج هالإمتحان علشان يعرفون مستواهم بالإنجليزي أو إذا بغوا يتوظفون يحتاجون هالإختبار , عموووما إن مو متعلق نهائيا بالأكاديميك اللي مختص بقبول الجامعات سواء داخل أو خارج الدوله والمتعلق أكثر مع الدراسة على خلاف الجينيرال اللي متعلق أكثر بالسفر والهجرة ,, طبعا الأكاديميك أصعب من الجينيرال ,, واهو مهم أكثر من الجينيرال بالنسبة لنا ,, وجامعتنا حاليا يبون الأكاديميك غير الأكاديميك ما راح يقبلون .

فبما إني اختبرت نوع الأكاديميك و بما ان الجامعة تقبل فقط نوع الأكاديميك وبما إني ما أعرف شي عن الجينيرال  ,, فراح اشرحلكم عن اختبار الآيلز نوع الأكاديميك فقط .

__________________________________________________ ________

اختبار IELTS ينقسم إلي أربع أقسام :

القسم الأول اهو Listening أي الإستماع.

القسم الثاني اهو Reading أي القراءة .

القسم الثالث اهو Writing أي الكتابة .

القسم الرابع اهو Speaking أي المحادثه .

والله ما اخش عليكم ,, ما كنت اعرف أي شي عن هالإمتحان اللهم إن امتحان انجليزي اذا يبت فيه درجة عالية اطوف التمهيدي ,, بس طبعا بعدها وخصوصا بعد ما قرب وقت الإختبار ,, فتحت الإنترنت وما شاء الله الإنترنت مترووس فيه كل شي مراجعات امتحانات دروس عن الإختبار و طبعا سئلت ناس امجربين الإمتحان فاخذتلي فكره عامه عنه ,, وطبعا بعد فترة كلمت Ms.Laila Maarefi معانا بالجامعة عن هالإختبار ويزاها الله ألف خير وماقصرت والله عطتني كتاب جدا قوي ومفيد و أنصح الكل فيييه بصراحة ,, اللي اهو :

هالكتاب فيه تمارين عن الكتابة والقراءة والإستماع ومعاه سيدي والسيدي وايد مهم حق المحادثة وأيضا الإستماع ,, والكتاب كان محلول ومفهموم وجدا فادني حق الدراسة وطبعا موضوع الدراسة اقولكم عنه بآخر الموضوع  ,, فشكرا ميس ليلى وما قصرتي بصراحة .

نرجع إلى محور حديثنا 

الإختبار مدته ساعتين و45 دقيقه اللي اهو الإستماع والقراءة والكتابة فقط ,, والمحادثة يكون وقته بروح إما نفس اليوم العصر او إنه بعده بيومين أو اسبوع ,, طبعا حسب اهم متى يحطونلكم موعد حق هالقسم من الإمتحان ,, ومثل ما الأغلبية عارف إن سعر التسجيل للإمتحان 69 د.ك والتسجيل يكون بـ britich councel بالمنصورية خلف النادي العربي ,, ومكان الإمتحان يكون غالبا بالجامعة الأمريكية بالسالمية تتمحنون الإستماع والقراءة والكتابة مثل ما قلتلكم ,, و إختبار المحادثة يكون بمكان الـ britich councel حسب متى ما اهم يحطونلكم موعد حقه .

* راح ابلش الحين معاكم بأول قسم بالإمتحان اللي اهو قسم الـ listening :

مدته 45 دقيقه ,, و اهو بصراحه كان أصعب جزء علي بالإمتحان ,, يمكن البعض أو الأغلبيه عنده العكس انه سههل وما يبيله شي ,, بس نصيحتي لكم وخاصة هالجزء تمرنوا عليه وايد من خلال كتب التمارين وحتى لو تتمرنون عليه مره او مرتين بس قبل الإمتحان ,, المهم اتعرفون شنو راح اييكم وشلون طريقة إختبارالإستماع وما تنصدمون حزت الإختبار ,, ما اقص عليكم والله يا جماعه اني لا تمرنت على هالجزء ولا سويت فيه أي شي وقلت بيني وبين نفسي سههل بس اسممع و أحل ,, طبعا مالكم شغل فيني لحد يقلدني وما يتمرن عليه وحرام ما اتييبون فيه علامه حلوه لأني ادري لو اني متمرن عليه جان يبت درجه أعلى من اللي يبتها ,, انصحكم نصيحه : طبعا انتوا راح تمتحنون بأقلام رصاص ,, اللي تسمعونه كتبوه بورقة الإختبار وتالي مسحوه بالمحاية مو مشكله ,, ونصيحه ثانيه أهم من الأولى ولازم لازم اتطبقونها ومن غيرها راح تضيعون : اقروا الأسئلة الموجوده واقروا الإجابات كلها أيضا قبل ما يبلشون ويشغلون الشريط ,, وايد وايد راح تفيدكم هالشغله بحيث انكم خلاص اتعرفون شنو المعلومات اللي تحتاج انكم اتسجلونها علشان اتحلون الأسئلة ,, وطبعا راح يعطونكم دقيقتين اعتقد قبل ما يبلش شريط الإستماع علشان تقرون الأسئلة واتعرفون عن شنو الموضوع راح يتكلم والإستماع مقسم الى كذا جزء وبكل جزء فيه أسئلة وقبل ما يشغلون أي جزء راح يعطونكم وقت علشان تقرون الأسئلة فلا تخافون من شي فقط حطوا فبالكم هالنصيحتين اللي نصحتكم ياها ,, وفي شغله يديده اول مره اعرفها بإختبار الإستماع ان فيه اكمل فراغ واكمل جدول بس لا تخافوون هذا كل راح تتعودون عليه مع التمارين وبيكون سهل عليكم ان شاء الله ,, فقط اقروا الأسئلة والأجوبة وركزوا عدل على الكلام اللي راح تسمعونه وتالي كتبوا الكلمات او النقاط المهمة اللي تحتاجونها حق حل الأسئلة ولا تنسون انكم تتمرنون عليه .

خلصنا من هالقسم وشلنا السماعات المؤذية من روسنا علشان انبلش بالجزء الثاني من الإختبار ,, طبعا مافي شي اسمه استراحه بين كل جزء و جزء ,, راح تقعدون بالكرسي ساعتين و 45 متواصله الله يعينكم ,, بس طبعا تقدرون تروحون تكرمون للـ wc 

المهم 

* ألحين راح ابلش معاكم بالقسم الثاني من الإختبار و اهوه الـ Reading :

مدته ساعه وحده ( 60 دقيقة ) ,, البعض عنده هالجزء سهل والبعض الآخر ممكن ان يلقى صعوبة بقسم القراءة ,, يعتمد أكيد على تعودكم على القراءة وعلى سرعتكم في القراءة والفهم وأيضا على قوة الفوكابلري عندكم و أشياء كثيره ,, وان شاء الله الحين بشرحلكم شلون طريقة هالجزء و أفضل الطرق للنجاح فيه ,,, قسم القراءة يتكون من 3 قطع وكل قطعة عليها أسئلة و مجموع الأسئلة كلها 40 سؤال ,,, ضروري ضروري ضروري تكون معاكم ساعة يد علشان تحسبون الوقت اللي تاخذونه مع كل قطعه ,, مثل ما قلتلكم 3 قطع وعليهم 40 سؤال وعندكم ساعه وحده ( 60 دقيقة ) معناتها انكم اتقسمون هالقطع على 20 دقيقة بكل قطعة ,, حاولوا إن ما يعدي الوقت على القطعة الوحده أكثر من 20 دقيقة ,, لأن الوقت بصراحه وايد ضيق واهني اتكون الصعوبة بهالجزء ,, وطبعا القطعه الوحده مو براقراف 7 أو 8 أسطر القطعه الوحده ممكن فيها حوالي من 1500 إلى 2500 كلمة يعني مو شويه ,, لا تخافون هذا كله راح تتعودون عليه مع شوية تمارين قبل الإمتحان وراح يكون عليكم سهل ان شاء الله ,, بس حطوا فبالكم الساعه وكللللش لا تنسونها لأن حتى مع الأقسام الثانيه هم تحتاجون الساعه وعندكم انتوا بقسم القراءة 3 قطع واذا انتوا ما عندكم ساعه عادي اتخلص هالـ 60 دقيقة وانتوا ما خلصتوا أسئلة القطعه الثانيه وحطوا فبالكم بكل قطعه 20 دقيقة فقط قراءة القطعه 10 دقايق وحل الأسئلة 10 دقايق وبعدها اتبلشون بالقطعه الثانيه 20 دقيقة وبعدها القطعه الثالثه 20 دقيقة ويكون المجموع 60 دقيقة ساعه كامله ,,, وعندي لكم مهارتين جدا بيفيدونكم وراح تساعدكم وايد واهي بصراحة ساعدتني بشكل كبير و لولا هالمهارتين جان أنا كنت شبه ضايع من القطعه الثانيه ,, المهارتين اهم ( Skimming – Scanning ) ولازم انكم اتكونون عارفين هالمهارتين وعارفين شلون اتطبقونها علشان تتقنون هالجزء من الإختبار ,, مهارة الـSkimming ( طريقتها اتكون نفس لمن تقرون المقالات و المواضيع بالجرايد وإذا كانت المقاله مهمة عندكم كملتوا قرائتها إذا مو مهمة وقفتوا وما كملتوا وراح تقرون بس أول جملة و آخر جملة ,, أدري ما فهمتوا  ,, شلون راح اتطبقون هالمهارة بالإمتحان ؟!! , الله يسلمكم يعني راح تقرون أول جملة و آخر جملة من كل قطعه لأن القطعه تتكون من المقدمة اللي تتكلم عن الموضوع بشكل عام والـ supporting ideas اللي تكون بنص القطعه و من الخاتمة اللي تتكلم عن ملخص الموضوع اللي قريتوه بالقطعه ,, فلمن تقرون المقدمه والخاتمه فقط راح اتعرفون القطعه عن شنو تتكلم وهالشي راح يساعدكم أيضا على كتابة عنوان صغير بجانب كل قطعه وهالشي راح يفيدكم وقت الأسئلة انكم ما تبحثون بين كل القطع ومن خلال هالعنوانين الصغيره اللي راح تكتبونها بجانب كل قطعه بتعرفون هالسؤال متعلق بأي قطعه ) ,,, خلصنا من مهارة الـ skimming وألحين نشرح لكم مهارة الـ Scanning ,, مهارة الـ Scanning ( اللي اهي انكم لمن تقرون أي سؤال صيدوا كلمه رئيسية بالسؤال أو كلمتين علشان على طول تروحون للقطعه المتعلقه بهالسؤال ومن خلال هالكلمتين راح تقرون الجمل المكتوبه عنهم وراح تعرفون اجوبتهم وتحلون الأسئلة ,, طريقة جدا سهلة و حلوه وراح تساعدكم بشكل كبير ,, فقط انكم تطلعون كلمه او كلمتين بالسؤال وتروحون تبحثون عنهم بالقطعه )

طبعا في كتب متعلقة بهالجزء وفيها تمارين كثيرة ,, انتوا اهم شي حاولوا تقوون الفوكابلري عندكم لأن هالجزء وايد محتاج منكم ان تكون عندكم معرفة لمعاني أغلب الكلمات الأكاديميه ,, فحاولوا لمن تتمرنون طلعوا معاني الكلمات اللي مو عارفين معناتا وحفظوها ,, وفي كتاب جدا مهم وراح يفيدكم اللي اهو Check Your Vocabulary for IELTS ,, تقدرون تنزلونه من الإنترنت على صيغة pdf ,, فيه الكلمات اللي راح اتييكم بإختبار الآيلز بكل أقسامه .

خلصنا هالجزء من الإختبار وطبعا راح تكونون شوي متمللين وبس خلاص تبون اتردون البيت  ,, بس مو مشكله  تحملوا ,, وايي من بعدها قسم الكتابة ,, هالقسم انا بصراحه عندي أسهل قسم مرعلي من بين الأربع أقسام ,, لكم الحرية بالكتابه وبالشرح وان شاء الله لمن اتخلصونه اتقومون وترتاحون .

* انبلش ألحين معاكم بثالث قسم بالإختبار اللي اهو الـ Writing :

مدته ساعه وحده ( 60 دقيقة ) ,, راح يعطونكم مهمتين بمعنى سؤالين والسؤالين راح تكتبونهم اجباري مو تختارون واحد منهم ,, السؤال الأول المسمى بـ Task 1 ( مطلوب منكم تكتبون فيه حوالي 150 كلمة ,, راح اييلكم بطريقة رسم بياني مذكور عليه أرقام و سنين معينه والرسم البياني متعلق بموضوع معين والمطلوب منكم انكم تشرحون هالرسم البياني بأسلوبكم انتوا ,, والرسم البياني هذا مثال عنه > > :

طبعا أكيد راح تنصدمون من الشكل وراح اتقولون شنو هذا @@ و وايد صعب , وشلون راح انحله ,, وأنا كنت نفسكم بالضبط لمن شفت الرسم البياني بوقت ما كنت بدرس حق الإختبار وايد انصدمت وخفت منه وقلت هذا ما راح اقدر احله ,, بس والله لمن عرفت طريقة الحل استانست وااايد وضحكت على نفسي ليش اني كنت خايف منه وهذا من كثر ماهو سهل ,, في كلمات معينه لازم تحفظونها واتعرفون معناتتها لأنكم راح تكتبونها وقت ما تشرحون الرسم البياني ,, مثل decline هبوط – increase زياده و في مجموعه كبيره من الكلمات المتعلقة بشرح الرسم البياني ,, هالكلمات تستخدومنها شلون ؟!! ( مثلا في سنة 1965 نفس اللي موضح بالرسم البياني أعلاه حدث هبوط في عدد المدخنين من الرجال ) و تذكرون الكلمات هاذي ,, هذا مثال صغير ,, طبعا اييكم يا على شكل عواميد بالطول أو بالعرض أو على شكل خطوط ,, ولا تخافون كللللللش , سهل سهل وهذا أسهل جزء بالإمتحان ممكن يكون ,, وطبعا أنا ما راح اكتفي بهالشرح البسيط واللي اقدر عليه ان شاء الله بسويه لكم ,, وبآخر الموضوع راح احط لكم لينك تحملونه على صيغةrar وتدخلون على فايل الـ writing وراح تلقون كذا طريقة لشرح الرسومات البيانيه والجدوال وكذا مثال ,, انتوا اللي عليكم اتسوونه انكم تقرون هالأمثلة اللي راح اتشوفونها واتطبقون نفسها بالإمتحان ,, وهم في شغله ,, طبعا اهم ما يبون بهالسؤال انكم تكتبون topic sentece أو مقدمه وبعدها آخر شي اتكون الخاتمه نفس طريقة البارقراف , لأ اهم بس يبونكم تشرحون الرسمه البيانية اللي بيعطونكم ياها و يبون يعرفون هل انتوا اتعرفون تشرحون الرسومات البيانية ويبون يشوفون طريقتكم بالشرح فقط لا غير ومالا داعي انكم اتبلشون بمقدمه عن الموضوع وخاتمه ,, يعني لا تحاتون أيضا مع جم تمرين بتكون عليكم مثل شربة الماي ,,, طبعا الـtask 1 لازم اتخلصونه بحدود 20 دقيقه علشان اتخلون الـ 40 دقيقه الثانيه حق الـ task 2 ,, واهم يبون حق الـ task 1 فقط 150 كلمة وما اعتقد ان هالـ 150 كلمة صعبه عليكم اتخلصونها بـ 20 دقيقة وكل اللي مطلوب منكم انكم تشرحون فقط لا غير تذكرون بالسنه الفلانيه صار في زياد وبالسنه الفلانية صار في ثبات بالنسبه وبعدها صار في هبوط بسس جذي ومن غير ما اتزيدون كلام من عندكم )

خلصنا من الـ task 1 و ألحين اندش لكم بالـ task 2 ,,, الـ task 2 ( مطلوب منكم حوالي 250 كلمة وهذا السبب اللي خلاني اقولكم حطوا 40 دقيقة حق الـ task 2 ,, و طبعا سهل سهل بشكل مو طبيعي راح اييبون لكم مواضيع من عندهم وتكتبون عنها ,, وكتبوا بهالtask كثر ما تقدرون وقولوا وطلعوا كل اللي فيكم بهالتاسك ,, واهم يبون رايكم واقتراحاتكم فقط وبيشوفون انتوا شتقدرون اتقولون بخصوص الموضوع اللي راح اييبونه لكم ,, أنا يالي عن الموبايل فون ,, كتبت كللللللل شي عن الموبايل فون وكتبت عن التطور بالأجهزة وبحياتنا بشكل عام ودخلت مواضيع ثانيه وقلت رأيي واقتراحاتي وحتى اني طفت الـ 250 كلمة وكان ودي اني اكتب اكثر بس هم كنت ابي ارتاح ,, وبهالجزء طبعا لازم تكتبون المقدمه أول شي بعدها الـ supporting ideas وآخر شي الخاتمة ,, اعتقد ان الكل عارف يكتب بهالطريقه و هذا ما يبيله دراسه او تقدرون تتمرنون عليه من خلال الكتب اللي فيها تمارين الكتابه واتشوفون هم بالإنترنت شنوا المواضيع اللي دايما اييبونها وبس جذي  ) ,, سهل لا تخافون منه و نسيت انبهكم للمره الثانيه بخصوص الساعة وضروري يا جماعه ان يكون عندكم ساعه تحسبون وقت التاسك الأول 20 دقيقة مو أكثر من 20 دقيقه والتاسك الثاني 40 دقيقة وطبعا انا بقالي وقت من هالـ 40 دقيقة وقعدت فيها ارتحت و تطمشت على اللي قاعدين يمتحنون معاي 

و أخيرااااااا خلصنا الإمتحان وخلصت الـ ساعتين و 45 دقيقه وبعدها يوزعون عليكم ورقه مكتوب عليها كل واحد ومتى اختبار المحادثه ماله ,, طبعا اختبار المحادثة ما يكون بنفس مكان اختبار الإستماع والقراءة والكتابة اللي مثل ما قلتلكم ان غالبا ما يكون بالجامعة الأمريكية بالسالميه ,, اختبار المحادثة يكون عندهم بالـ britich councel بالمنصورية ,, وانا كان اختباري المحادثة بنفس اليوم العصر احسسسسسن علشان افتك ,, وكان بالضبط الساعه 3 وثلث ,, وانا خالص امتحاني الساعه 12 وشي ,, فرجعت البيت وصليت وتالي طلعت وتغديت وارتحت ليمن صارت الساعه 3 ورحتلهم ,, وان شاء الله بقولكم وبشرح لكم كل اللي اعرفه عن قسم المحادثة .

* و ابلش معاكم ألحين بشرح قسم الـ Speaking :

مدة قسم المحادثة بين الـ 10 دقايق إلى 12 دقيقة ,, تختلف طريقة قسم المحادثة باختبار الآيلز عن اختبار التوفل ,, وهذا سبب من الأسباب اللي خلتنا انقول إن الآيلز أسهل من التوفل ,, الآيلز الله يسلمكم طريقته انكم راح تقعدون إما مع واحد أو مع وحده وتسولفون مع بعض حوالي 10دقايق , أما التوفل راح يكون الممتحن مع الكمبيوتر ومعاه ميكروفون ويسمعونه محادثه او موضوع ويتكلم عن هالموضوع ,, فأكيد و أنا مرتاح وامهدي وقاعد عالكرسي ومربع ايدي واطالع اللي قاعد يمتحني ويطالعني احسن بوايد من الكمبيوتر وميكروفون  ,,, طبعا هالقسم يبت فيه أقل درجة لأني و للأسف مو قوي بالمحادثة  ,, في البداية قعدوني مع وحده اجنبيه ما ادري شنو جنسيتها بس اعتقد بريطانيه ,, بلشت معاي واضغطت على جهاز التسجيل و اسئلتني اول شي عن نفسي ( شسمك ؟ ,, وين ساكن ؟ ,, وين تروح بالويك اند ؟ ,, جم اخ و اخت عندك ؟ ) ومن هالأسئلة ,, اعتقد إن هالجزء سهل وانا الحمدلله هم كان سهل علي ورديت على كل أسئلتها  ,, بعدها بالجزء الثاني من هالقسم راح يعطونكم ورقه هالورقه فيها كلام من سطرين او 3 سطور عن موضوع معين و يقولون لكم اتكلموا عن هالموضوع ,, وطبعا قبل ما يقولونلكم ياللا اتكلموا راح يعطونكم دقيقتين علشان ترتبون افكاركم وراح يعطونكم ورقه و قلم علشان تكتبون عن شنو راح تتكلمون و علشان ما تنسون اللي فكرتوا اتقولونه بوقت ما تتكلمون ,, فمساعدينكم بشغلتين الأولى انهم معطينكم ورقه و قلم تكتبون انتوا شراح تتكلمون فيه والشغله الثانيه الدقيقتين اللي راح اترتبون فيها افكاركم واتفكرون شنو راح اتقولون ,,, أنا ياني عن الـ news وسئلتني شتفضل الأخبار انك تسمعها بالتلفزيون او تقراها بالجرايد ؟ و ليش ؟ ,, و شنو الأخبار اللي اتحب تسمعها ؟ وهم ليش ؟ ,,, بهالجزء شوي انا خرتها ومادري ليش توترت وايد معنه كلش جو الغرفه والمكان ما كان يوتر ,, و هم في جم سؤال ما فهمتهم وقلتلها اني مو فاهم ,, بس عموما قسم المحادثه ما يبيكم اتكونون فلته بالمحادثه وترا أغلب المواضيع اللي يطلبونها منكم انكم تتكلمون عنها سهله مثل اللي ياني ( news ) ما اعتقد ان في أسهل من جذي  ,, و واحد مثلا ياله عن ( laws ) انكم تتكلمون عن القوانين بالدوله و مثلا واحد ياله عن ( leader ) تتكلمون عن شخصية القائد وشنو الصفات اللي لازم تكون موجوده فيه ,, يعني لا تحاتون ,, وان شاء الله مع السيدي الموجود بكتاب التمارين راح اتحطونه عندكم بالكمبيوتر و تتمرنون عليه وهم الإنترنت فيه كل شي تحتاجونه بخصوص هالقسم من الإختبار .

و الحمدلله رب العالمين تم الشرح على جميع أقسام الإمتحان ,, واعذروني على الأخطاء الكتابية و أيضا على الأسلوب اللي ممكن يكون مو واضح عند البعض ,, ولا تترددون بأي سؤال مو عارفينه و أنا حاضر باللي تبونه .

طبعا أنا ما خلصت و تو الناس 

قريتوا وايد بهالموضوع ( كتاب تمارين ) او ( تتمرنون) والأغلب ما عنده هالكتب اللي راح تتمرنون عليها ,, اهي موجود بالبريتيش كاونسل وتنباع عندهم بس المشكله انها ما راح تكون محلوله ,, اذا تقدرون تحلونه هالشي وايد أحسن و أفضل لكم ,, اذا تبونه محلول وجاهز انا عندي كتاب ميس ليلى اللي معاه سيدي المحادثه والإستماع موجود عندي و انا ان شاء الله راح انسخ الكتاب كله ومع السيدي ومع كتاب ثاني عندي هم للتمارين و بروح مكتبة الجامعة وبخليه عندهم علشان تنسخون منه ,, وبصراحه ما عندي فكرة اذا اهم يرضون احطلي نسخه علشان تنسخون منها او لأ ,, بس ان شاء الله يرضون .

شوي بكلمكم عن نفسي و عن الإمتحان و بشكر إنسان ساندني وايد بهالإمتحان ومابي انسى فضله علي ,, فأرجو انكم تقرون هالجزء الصغير :

إختبار الآيلز فرصة بالعمر ما تتعوض ,, وترا الإختبار مستواه سهل ,, و اهو ما يبيله دراسه بس مجرد انكم تتمرنون واتعرفون شلون طريقة الإختبار ,, وخاصة لطلبة التمهيدي نصيحتي لكم لا اتضلون بهالمرحله واتضيعون وقت من عمركم علشان مرحله مالها أي أهمية ,, ولحد يقول لأ احنا نبي التمهيدي علشان نتعلم ,, يا جماعه الإنجليزي ما يحتاج إلى مراحل تعليم احنا اوردي بالمدارس تعلمنا الإنجليزي ,, بس ألحين احنا فقط محتاجين الممارسه ,, نقرا كتب وايد, نكتب بالإنجليزي وايد , نسمع بالراديو , ونقرا جرايد , انطالع أفلام و مسلسلات ,, بجذي راح نمارس ونتقوى بالإنجليزي ,, وترا على فكره في طلبه معانا بالجامعه خذوا التمهيدي esl 1 و esl 2 وعدوا الأكاديميك والفريش مان و وصلوا إلى آخر مرحله بالإنجليزي و ليلحين ما يعرفون يتكلمون وهذا بسبب انهم ما قعد يمارسون وفقط يدرسون حق الإختبار علشان ينجحون ,, فلحد يفكر إن إذا طاف التمهيدي وما اخذه ما راح يصير قوي بالإنجليزي ,, انتوا بتدرسون المواد والمواد كلها انجليزي وهاذي كلها اسمها ممارسه 

أما عن نفسي ,, ما أخفي عليكم أي سر ,, أنا ما تمرنت ولا راجعت حق الإختبار واعتمدت على ربي وعلى شخص له فضل كبير علي والله من غيره أنا ما كنت يايب الدرجه اللي يبتها واللي خلتني أعدي التمهيدي ,, وهذا الشخص اسمه هاشم ( العضو Hashoom ) شخص تعرفت عليه من المنتدى اللي احنا فيه وتقريبا صارلنا 4 شهور انعرف بعض ,, الله يشهد اني ألحين اعتبره أخوي و أكثر من أخوي وكأني اعرفه من 10 سنين و أخجل اني اقول عنه صاحبي أو ارفيجي لأن مكانته بقلبي أكثر من مكانة صاحب أو ارفيج ,,, اهو اللي يزاه الله ألف خير قالي بدرسك حق هالإختبار لأن كان امجربه من قبل وياب في علامه حلوه ,, واتصدقون اني قعدت معاه ساعه وحده بس أو يمكن ساعه ونص بالكثير يدرسني حق هالإمتحان وكنا قاعدين بمقهى وشغال التلفزيون وطبعا أنا اغلب الوقت كنت لاهي عنه واهو قاعد يدرسني ,, ومع ذلك برغم هالساعه الوحده اللي درسني فيها , طفت مرحله التمهيدي و وصلت لهدفي الحمدلله وتحققت امنيتي ,,, فشكرا اخوي هاشم وماقصرت بصراحه سويتلي شي وايد مهم بحياتي ومن المستحيل اني انسالك ياها و مردووده ان شاء الله ,, وأيضا مريت بضروف شخصيه صعبه قبل الإختبار بيوم ,, وفكرت من هالضروف اني اعطي الإمتحان طاف وما امتحنه لأني كنت متيقن اني ما راح اييب فيه درجه زينه ,, بس الحمدلله على كل حال عدت الأمور على ما يرام ,, وأنا بس حبيت أوضح لكم من كلامي هذا إن على الغرم من الضروف اللي مريت فيها وعلى الرغم اني درست حق هالإختبار ساعه وحده بس وهاذي أول مره أجرب فيها هالإختبار الحمدلله يبت الدرجه اللي ابيها ,, والإختبار سهل وحرام اتطوفونه على نفسكم ولحقوا على عمركم وسجلوا فيه ,, وترا عادي إدارة الجامعه تطلع بقرار إن إختبار الآيلز مرفوض ,, فسارعوا بالتسجيل .

وفي شغله نسيت اقولكم ياها ,, كمعلومه فقط ,, الإختبارات تتصلح ببريطانيا والنتيجه تطلع بعد 13 يوم من الإختبار ,, الله يعينكم و يصبركم على هالـ 13 يوم ,, وحمدوا ربكم التوفل تطلع بعد شهر .

اتفضلوا هذا لينك اتحملونه فيه ملف عن كل قسم من أقسام الإختبار , و أيضا فيه كتاب (Common Mistakes in IELTS - Itermidiate ) اللي يتكلم عن الأخطاء الشائعه اللي تكون من الممتحنين و أيضا فيه كتاب (Check Your Vocabulary for IELTS ) اللي كلمتكم عنه سابقا :

http://www.4shared.com/file/78031133/242ab0f0/IELTS.html

ولازم يكون عندكم برنامج Adobe Reader علشان اتشغلون الملفات الموجوده فيه ,, واتفضلوا هذا لينك لتحميل برنامج Adobe reader :

http://www.adobe.com/products/reader

تنزلون آخر الصفحه وتضغطون على Next steps وبعدها تضغطون على download

وممكن أحد فيكم ما عنده برنامج winrar لفك الضغط واتفضلوا هذا لينك لتحميله :

http://www.rarlab.com/rar/wrar380a.exe

و بالنسبه لكتب التمارين المحلوله اللي كلمتكم عنها ,, ان شاء الله راح انسخه وانسخ معاه السيدي المرفق واحطه لكم بمكتبة الجامعه ,, و إذا ما رضوا بشوفلي طريقه ثانيه علشان اوصلكم فيها النسخه وبقولكم الطريقه ,, ومادري بعد 

في شي بعد ناقص ونسيت اقووله ؟؟!!

ايييي صح ,, بالنسبة للـ Grammar الإختبار مافيه قسم للقرامر وانما القرامر يشوفونه من خلال كتابتك في قسم الـ writing .

عموما إذا في أي شي منتو عارفينه , محتاجين شرح عنه , أسئلة بخاطركم ودكم تسئلونها ,, أنا حاظر وتحت خدمتكم .

* ملاحظة : الموضوع ليس منقول من أي منتدى أو موقع آخر ,, و هو من كتابتي الشخصية .

بالتوفيق والنجاح للجميع

تحياتي لكم :

اخوكم : حسن